Хитой–АҚШ стартапи — Lucid Motors компанияси Air номли электромобил прототипини расман намойиш қилди, деб хабар бермоқда Motor. Tesla Model S русумли электромобилга рақобатчи бўлиши кутилаётган янги машиналар серияси 2018 йилда ишлаб чиқарилиши кўзда тутилган.
Lucid Air иккита электр агрегат билан жиҳозланган: бири олд, иккинчиси орқа қисмдаги ўққа ўрнатилган. Мазкур автомобиль 2,5 сония ичида 96 километргача тезлик олиши мумкин. Унинг максимал тезлиги эса соатига 315 километрни ташкил этади.
Харидорларга аккумулятор ҳажми 100 ва 130 КВт/соат бўлган комплектдаги электрокарлар таклиф қилинади. Ҳажми соатига 130 киловатт бўлган машина қайта қувватланишсиз 643 километргача масофани босиб ўтиши мумкин. Таққослаш учун, худди шундай ҳажмдаги Tesla Model S 506 километр масофани босиб ўтади.
Янги автомобиль «ҳайдовчисиз ҳайдашга тайёргарлик» тўплами билан жиҳозланган бўлиб, у кичик радиусли радар, видеокамера ва узоқни ўлчайдиган оптик асбоб – LIDAR’ни ўз ичига олади.
Lucid Motors компанияси Air электрокарларини ишлаб чиқариш учун 2017 йили АҚШнинг Аризона штатида ўз корхонасини ташкил қилмоқчи. Унга 700 миллион доллар инвестиция қилинади. 2018 йили компания 250 та электромобил ишлаб чиқаришни режалаштирган. Кейинроқ ишлаб чиқариш ҳажми оширилади.
Lucid Air электромобилининг тахминий нархи 100 мингдан 160 минг долларгача бўлади. Кейинчалик компания нархи 65 минг доллар бўлган электромобил сериясини ҳам ишлаб чиқармоқчи.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)