Чегара билмаётган Хитой клублари Лионель Мессини мамлакатга олиб келиш ҳаракатига тушди. «Чемпионат»нинг AS нашрига асосланиб хабар беришича, «Хебей Чайна Форчун» клуби аргентиналик футболчи учун йилига 100 миллион евро тўлашга тайёр.
Солиштириш учун, дунёда энг катта маош олаётган футболчи ҳам айнан шу жамоада тўп суради — аргентиналик Эсекьель Лавесси. Унинг йиллик маоши 30 миллион еврога тенг. Криштиану Роналду «Реал»дан 50 миллион ишлаб топади. Бироқ бунда Nike компаниясидан келадиган даромад ҳам қўшиб ҳисобланган. Солиқлар футболчининг гарданида.
«Хебей Чайна Форчун» эса Лионель Мессига солиқларсиз 100 миллион беришга тайёр. Бунда футболчи нақд 100 миллион олади, солиқлар эса клубнинг гарданида қолади.
Маълумот учун, Мессининг «Барселона» билан шартномаси 2018 йилнинг ёзида ўз якунига етади. Каталония клуби футболчига янги шартнома таклиф қилиб улгурди. Унда Лионелнинг 35 миллион евролик йиллик маош олиши белгилаб қўйилган бўлиб, бу билан Месси дунёда энг катта маош оладиган футболчига айланиб олади. Хитой клуби таклиф этаётган пул эса бундан 3 баробар кўпроқ.
Аввалроқ Лионель Месси «Барселона» билан шартномасини шунчаки узайтирмаслиги учун «Манчестер Юнайтед» 100 миллион евро беришга тайёр экани ҳақида хабар пайдо бўлганди. «Манчестер Сити» эса уни ўз сафига қўшиб олиш учун 230 миллион евронинг баҳридан кечишга тайёр.
«Олтин тўп»га 5 бор сазовор бўлган футболчи биринчи профессионал шартномасини «Барселона» билан имзолаган бўлиб, айни пайтда клубдан йилига 29 миллион евро маош олади. Янги келишувга кўра, бунда солиқлар ҳам «Барса»нинг гарданига ўтган. Клуб футболчи учун фаолиятининг сўнггига қадар мўлжалланган шартнома таклиф қилиш ниятида.
Уни ўз сафига чорлаётган «Хебей Чайна Форчун» клубини ўз вақтида «Манчестер Сити» ва «Реал Мадрид»да фаолият олиб борган Мануэль Пеллигрини бошқаради. Унинг қўл остида Гаэл Какута, Эсекьель Лавесси, Стефан Мбиа, Жервиньо каби футболчилар тўп суради.
Изоҳ (0)