Chegara bilmayotgan Xitoy klublari Lionel Messini mamlakatga olib kelish harakatiga tushdi. “Chempionat”ning AS nashriga asoslanib xabar berishicha, “Xebey Chayna Forchun” klubi argentinalik futbolchi uchun yiliga 100 million yevro to‘lashga tayyor.
Solishtirish uchun, dunyoda eng katta maosh olayotgan futbolchi ham aynan shu jamoada to‘p suradi — argentinalik Esekyel Lavessi. Uning yillik maoshi 30 million yevroga teng. Krishtianu Ronaldu “Real”dan 50 million ishlab topadi. Biroq bunda Nike kompaniyasidan keladigan daromad ham qo‘shib hisoblangan. Soliqlar futbolchining gardanida.
“Xebey Chayna Forchun” esa Lionel Messiga soliqlarsiz 100 million berishga tayyor. Bunda futbolchi naqd 100 million oladi, soliqlar esa klubning gardanida qoladi.
Ma’lumot uchun, Messining “Barselona” bilan shartnomasi 2018-yilning yozida o‘z yakuniga yetadi. Kataloniya klubi futbolchiga yangi shartnoma taklif qilib ulgurdi. Unda Lionelning 35 million yevrolik yillik maosh olishi belgilab qo‘yilgan bo‘lib, bu bilan Messi dunyoda eng katta maosh oladigan futbolchiga aylanib oladi. Xitoy klubi taklif etayotgan pul esa bundan 3 barobar ko‘proq.
Avvalroq Lionel Messi “Barselona” bilan shartnomasini shunchaki uzaytirmasligi uchun “Manchester Yunayted” 100 million yevro berishga tayyor ekani haqida xabar paydo bo‘lgandi. “Manchester Siti” esa uni o‘z safiga qo‘shib olish uchun 230 million yevroning bahridan kechishga tayyor.
“Oltin to‘p”ga 5 bor sazovor bo‘lgan futbolchi birinchi professional shartnomasini “Barselona” bilan imzolagan bo‘lib, ayni paytda klubdan yiliga 29 million yevro maosh oladi. Yangi kelishuvga ko‘ra, bunda soliqlar ham “Barsa”ning gardaniga o‘tgan. Klub futbolchi uchun faoliyatining so‘nggiga qadar mo‘ljallangan shartnoma taklif qilish niyatida.
Uni o‘z safiga chorlayotgan “Xebey Chayna Forchun” klubini o‘z vaqtida “Manchester Siti” va “Real Madrid”da faoliyat olib borgan Manuel Pelligrini boshqaradi. Uning qo‘l ostida Gael Kakuta, Esekyel Lavessi, Stefan Mbia, Jervinyo kabi futbolchilar to‘p suradi.
Izoh (0)