Халқаро валюта жамғармаси таҳлилчилари Африка, Осиё-Тинч океани, Кариб ва бошқа минтақалардаги умумий аҳолиси 1,5 миллиондан кам бўлган 34 ривожланаётган мамлакатда тадқиқотлар ўтказди. Аниқланишича, ҳар йили табиий офатлар оқибатларини бартараф этишга ЯИМнинг 2 фоизи сарфланар экан. Бу кўрсаткич ривожланган давлатларникидан тўрт баробарга кўпроқдир, деб хабар қилади «ТАСС».
Бундай мамлакатлардаги ҳар ўн табиий офатдан бирининг оқибатларини бартараф этишга ЯИМнинг 30 фоизига тенг маблағ сарфланиши аниқланди.
Келажак прогнозлари эса бундан-да аянчли бўлиб чиқди: 2080 йилга келиб табиий офатлар келтирадиган йиллик зарар Тинч океани ороллари мамлакатларида 15 фоизга, Кариб ҳавзаси давлатларида эса 8 фоизга етади.
Бундан ташқари, тадқиқ этилган мамлакатларда инвестиция кам киритилиши, ЯИМнинг пасайиб бориши ва бошқа иқтисодий муаммоларни ҳал қилиш учун имкониятлар етарли эмас.
Бу мамлакатларнинг учдан бирида хавф жуда юқори бўлиб қолади, яъни табиий офатлар энг муҳим соҳалар ривожини тўхтатиб қўяди ёхуд уларни таназзулга олиб келади. Балиқчилик, деҳқончилик, туризм шулар жумласидандир.
Муаллифларнинг прогнозларига кўра, 2030 йилга келиб юқорида омиллар туфайли 100 миллион киши қашшоқликда қолиб кетиши мумкин.
Мутахассислар ушбу мамлакатлар раҳбариятларига табиий офатлар оқибатларини бартараф этиш сиёсатини ва механизмларини олдиндан жорий этишни тавсия қилди. Одатда бундай ишлар офат келиб бўлганидан сўнг амалга оширилади, бунинг оқибатида эса кўрилган зарар жуда катта бўлади.
Изоҳ (0)