АҚШнинг сайланган президенти Дональд Трамп 2 декабрь, жума куни Twitter’даги саҳифаси орқали сайловлардаги ғалабаси билан қутлаш учун Тайвань президенти Цай Инвэннинг ўзи унга қўнғироқ қилганини билдирди. Трамп мазкур мулоқот ҳақида бир қатор ОАВлар маълум қилиб, буни «тарихий», ҳатто «фитна уйғотувчи» ҳодиса деб атаганидан сўнг шундай изоҳ қолдирди, дея хабар беради «Интерфакс».
Бу АҚШ ва Тайвань президентларининг икки давлат 1979 йилда дипломатик алоқаларни узганидан кейинги биринчи мулоқоти бўлса ажаб эмас. Гарчи шундан сўнг Вашингтон расман фақат Хитойни тан олган ҳолда Тайванни қўллаб-қувватлаб келган бўлса-да. Бу ҳақда Трамп келгуси твитида эслатиб ўтди: «Қизиқ томони, АҚШ Тайванга миллиардлаб доллардан иборат ҳарбий аслаҳаларни сотади, бироқ негадир мен табрик қўнғироғини қабул қилмаслигим керак».
Оқ уй ушбу суҳбат ҳақида олдиндан огоҳлантирилмагани маълум қилинмоқда. Бу ҳақда янгиликлар пайдо бўлганидан сўнг маъмурият «ягона Хитой» сиёсати тарафдори бўлиб қолиши ва Пекинни қўллаб-қувватлашини билдиришга шошилди.
Хитойда мазкур хабарларга ҳозирча изоҳ берилмади, бироқ Тайвань етакчиси билан мулоқот АҚШ ва Хитой ўртасидаги муносабатлар таранглашишига олиб келиши мумкинлиги айтилмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)