Эквадор президенти Рафаэль Корреа ўз ҳукуматининг барча вазирларидан истеъфога чиқишни сўради. Бу ҳақда Корреа Гаванага учиб кетишидан олдин маълум қилди, деб ёзади «Корреспондент.net».
Ҳукумат истеъфосининг аниқ сабаблари келтирилмаяпти, аммо Telegrafo портали ўз манбаларига таяниб ёзишича, бу «вазирлар маҳкамасини кислород билан тўйинтириш учун» қилинган. Бу лавозимларга кимлар тайинланиши Корреа Гаванадан қайтгач маълум бўлади.
Корреа ўзининг вазирлар маҳкамасига бундай сўров билан сўнгги марта 2014 йилда — маҳаллий сайловлар ҳукмрон партия учун омадсиз натижа кўрсатган вақтда мурожаат қилган эди. Ўшанда ҳам президент истеъфо сабабини изоҳлар экан, «ҳукуматга кислород зарур»лигини таъкидлаган эди.
Изоҳ (0)