Шанхай ҳамкорлик ташкилоти бош котиби Рашид Алимов бошчилигидаги ШҲТ кузатувчилари миссияси Ўзбекистон Президенти сайловига тайёргарликнинг бориши ва ўтказилиши билан танишиш учун 29 ноябрдан 5 декабргача Ўзбекистонда бўлади. Бу ҳақда халқаро ташкилот сайтида маълум қилинди.
Халқаро кузатувчиларнинг таклиф этилиши ШҲТ миссияси томонидан Ўзбекистон Республикаси раҳбариятининг Президентлик сайловини максимал даражада очиқ ва демократик руҳда ўтишини таъминлашга интилиши сифатида баҳоланмоқда.
Миссия таркибига ШҲТга аъзо давлатлар қонунчилик, ижро ва сайлов органлари вакиллари, ташкилот Котибиятининг мансабдор шахслари, жами 20 киши кирган. ШҲТ миссияси кузатув фаолияти давомида Ўзбекистоннинг барча сайлов округларида, имкон қадар кўпроқ сайлов участкаларида бўлишни мўлжаллаган.
ШҲТ миссияси Ташқи ишлар вазирлиги, Марказий сайлов комиссияси, Жаҳон иқтисодиёти ва дипломатия университетида учрашувлар ўтказиш, сайлов участкалари раис, котиб ва аъзолари, оддий сайловчилар, маҳаллий кузатувчилар, сиёсий партиялар, ОАВ вакиллари, хорижий давлатлар ва халқаро ташкилотлар кузатувчилар миссиялари раҳбарлари ҳамда аъзолари билан мулоқотда бўлишни режалаштирмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)