АҚШ президентлигига Демократлар партиясидан номзод Ҳиллари Клинтон фойдасига айрим штатларда овозлар қўшиб ҳисобланганини исботловчи ҳеч қандай далиллар йўқ. Бу ҳақда 28 ноябрь, душанба куни Оқ уй расмий вакили Жош Эрнест маълум қилди, дея хабар беради «Интерфакс».

«Гап шундаки, Трампнинг баёнотини тасдиқловчи бирон-бир далиллар тақдим этилмади», — дея таъкидлади Эрнест.

Олдинроқ АҚШ сайланган президенти Дональд Трамп бунга ишора қилиб ўтган ва Twitter’даги саҳифасида «Сайловчилар коллегиясида аксарият овозларга эга бўлишдан ташқари, агар миллионлаб ноқонуний овозлар бўлмаганида, аҳоли орасида машҳурлик бобида ҳам ғолиб чиққан бўлардим», дея изоҳ қолдирганди.

Шу билан бирга, кузатувчилар у ўз нуқтаи назарини қувватлаш учун далил-исбот келтирмаганини таъкидламоқда.

Маълумот учун, Трамп сайловчилар коллегиясининг 306 овозини (270 овоз талаб этилади) қўлга киритгани туфайли АҚШ президентлигига сайловларда ғолиб чиқди. Бироқ, ҳисоб-китобларга кўра, Ҳиллари Клинтон учун Трампга қараганда 2 миллион киши кўпроқ овоз берган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.