Назарбоев Остонани ўз шарафига номлаш фикрига қарши чиқди
Қозоғистон президенти Нурсултон Назарбоев мамлакат пойтахти Остонани ўз шарафига номлаш ғоясини қўллаб-қувватламади. У пойтахтнинг ребрендингга эҳтиёжи йўқлигини айтиб ўтди, деб хабар беради «РБК».
«Қаерга бормай, ҳамма ерда Остонани билишади. Шу боис унинг номини ўзгартиришга эҳтиёж йўқ. Бундай зарурат кўрмаяпман. Остонада ЕХҲТнинг XXI асрдаги биринчи саммити бўлиб ўтди, қишки Осиё ўйинларини қабул қилдик, энди ЭКСПО–2017, жаҳон анъанавий динлари съезди бўлиб ўтади... Бунинг бари Қозоғистон билан боғлиқ, лекин ҳамма ерда Остонанинг номи жаранглаяпти. Буни ўзгартиришга қандай эҳтиёж бўлиши мумкин?», — деди давлат раҳбари.
У шаҳарларнинг номини ўзгартириш масаласига босиқлик билан муносабатда бўлинишини таъкидлаб ўтди.
Бир муддат илгари Назарбоев парламентнинг ушбу ташаббусини кўриб чиқиб, давлат учун зарур қарор қабул қилиш лозимлигини айтиб ўтган эди.
