Футбол бўйича Ўзбекистон Олий Лигасининг сўнгги турида «Бунёдкор» рақобатчиси «Локомотив»га имкониятни бой берди. Учрашувдан кейинги матбуот анжуманида журналистлар бош мураббий Сергей Лушчаннинг фикри билан қизиқди.
«Нимадир дейишга ҳожат йўқ, ютқаздик. Натижа ҳаққоний. ‘Локомотив’ даражасидаги жамоага қарши ўйинларда 1 та хато ҳам қимматга тушади. Футболчиларнинг бор имкониятидан фойдаландик. Ҳозирча улар кўрсата оладиган натижа бу 2-ўрин. Ортиғига кучимиз етмайди. Жиддийроқ натижа керак бўлса, камида 3 нафар юқори даражали футболчи олишимиз керак. Жепаров ёки Кападзе кабиларни ўйнатиш учун молиявий имкониятимиз йўл бермайди», — деб Лушчандан иқтибос келтирган «Championat.asia».
Мавсум аввалида интервью берган Сергей Лушчан «Бунёдкор» учта фронтда ғолиблик учун кураш олиб бориши ҳақида айтиб ўтганди. Чемпионлар Лигасида клуб гуруҳ босқичидан нарига ўта олмаган бўлса, Ўзбекистон чемпионатида ғолиблик «Локомотив»га насиб қилди. Бу ҳолат мураббийнинг истеъфосига сабаб бўлиши мумкинми?
«Олдимда хориждан 5 та таклиф мавжуд. Истеъфога чиқаришса, клубга миннатдорчилик билдираман ва кетаман. Бу муаммо эмас. Чунки мен ўз ишимни кўрсатиб қўйганман. Ишсиз қолишдан эса нима қилишини билмай юрадиганлар кўпроқ қўрқсин. Менинг кўнглим тўқ, виждоним тоза», — деб айтиб ўтган Сергей Лушчан.
Маълумот учун, «Бунёдкор» айтиб ўтилган уч фронтдан фақатгина 1 тасида иштирокини давом эттирмоқда. 26 ноябрь куни клуб Ўзбекистон Кубогининг ярим финали жавоб ўйинида «Локомотив»га қарши саф тортади. Томонларнинг «Локомотив» майдонида бўлиб ўтган биринчи учрашувида «темирйўлчилар» минимал ҳисобда зафар қучганди.