Хонадонлардаги шинамлик нафақат дид билан танланган мебеллар, балки хонаки гуллар ва безак берувчи ўсимликларга ҳам боғлиқ. Гуллар кайфиятни кўтаради, илиқлик ва хотиржамлик ҳиссини беради, ҳар қандай хонанинг кўринишини ўзгартира олади. Хонадонингизни гуллар билан безатишнинг икки усули мавжуд: булар тувакка экилган гуллар ёки кесилган гуллар гулдастаси бўлиши мумкин. Бу икки усул бир-бирига мутлақо зид бўлмай, бир вақтнинг ўзида уларнинг ҳар иккаласидан фойдаланиш мумкин.
Кўпчилик учун гулларни қаерга қўйиш ҳал қилиш қийин бўлган масалага айланади. Қай бир хона қулайроқ: меҳмонхона, ётоқхона ёки болалар хонаси? Интерьерни ҳеч бир таомилга риоя этмасдан безатиш мумкин. Тувакларни қаерда кўришни истасангиз, ўша ерга жойлаштиринг!
Ошхона дераза токчаси сарҳил кўкатлар етиштириш учун ажойиб жой бўла олади. Тувакларга нафақат петрушка ёки шивит, балки ялпиз, исмалоқ ва райҳон ҳам экишингиз мумкин. Агар олачипор гуллар таъбингизга мос келмаса, ошхона токчасида ёрқин ёронгул ёки оқ, пушти ва бинафша рангларга эга гунафшани ўстиришингиз мумкин.
Агар сиз учун хонадондаги тоза ҳаво муҳим бўлса, «чўртанбалиқ думи» деб номланган ўсимлик турли ҳидларни ўзига яхши сингдириб олишидан хабардор бўлсангиз керак. У яхши ўсиб, алоҳида парваришни талаб қилмайди.
Агар меҳмонхонангиз кенг бўлса, фикус, ховей пальмаси, драцена ёки юкка каби йирик гулларни танлашни тавсия этамиз. Улар замонавий, шунингдек, классик услубда безатилган интерьерни ажойиб тарзда тўлдириб туради.
Хона гуллари билан безатишда ҳисобга олиш лозим бўлган яна бир нечта тавсиялар:
- агар хона гулқоғози майда суратларга эга бўлса, унга катта баргли, аксинча бўлганда эса майда баргли ўсимликлар кўпроқ ярашади;
- хонадондаги шароит қанчалик ясатилган бўлса, ундаги ўсимликлар шунчалик оддий бўлиши лозим;
- янада кўпроқ самарага эришиш учун ёритиб турувчи чироқлардан фойдаланинг — шунда гуллар ҳам ўзини яхши ҳис қилади, хонадонингиз интерьери ҳам бойроқ кўринади.
Изоҳ (0)