«Барселона» президенти Хосеп Мария Бартомеу турли миш-мишларга қарамай, клуб ҳужумчиси Лионель Месси фаолиятининг якунига қадар Каталония клубида қолишига ишонч билдирди. Бу ҳақда «Чемпионат» хабар бермоқда.
«Месси фаолиятини ‘Барселонада’ якунлашига ишонамиз. У кўп йиллардан буён жамоа муваффақиятига ҳисса қўшиб келмоқда», – деди Бартомеу.
Бир неча кун аввал матбуотда аргентиналик футболчи «Барселона» билан келишув муддатини узайтирмасликка қарор қилгани ҳақида хабар тарқалди. Goal’нинг Мессига яқин бўлган манбаси бу ҳақиқат эмаслигини билдирди. Кейинроқ Месси Янги йил байрамидан сўнг каталонияликлар билан шартномасини узайтириш борасида музокара ўтказиши маълум қилинганди.
Бир муддат аввал Лионель Месси футболчилик фаолиятини ўзининг биринчи клуби – Аргентинанинг «Ньюэллз Олд Бойз» клубида якунламоқчи экани ҳамда каталонияликлар билан янги шартнома имзоланса, у ерга кетиш имконини берувчи банднинг киритилишини истаётгани ҳақида хабар берилганди.
Эслатиб ўтамиз, Лионель Мессининг «кўк-анор ранглилар» билан амалдаги шартномаси 2018 йилнинг ёзига қадар мўлжалланган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)