Режиссёр Жаҳонгир Аҳмедов Instagram’даги саҳифасида актёр Матёқуб Матчонов билан бирга тушган суратини эълон қилди. Аҳмедовнинг қайд этишича, таниқли актёр билан ҳамкорликда, «талабларга биноан, янги кинокомедия»ни суратга олиш ишлари бошланган.
Журналист Феруз Муҳаммад янги фильм ҳақида батафсил ахборот олиш мақсадида, режиссёр билан боғланди.
«Ҳаётий воқеага асосланган супер-комедия суратга олишга киришганмиз. Бундан аввал суратга олинган ‘Тилим қурсин’ комедиясида ҳам худди ҳозиргидек катта шижоат, катта куч билан мириқиб, ўзимиз мазза қилиб ишлаган эдик, ҳозир ҳам шундай бўляпти. Янги фильм ҳозиргача олинган комедияларнинг ҳар қандай форматларидан юқори даражада бўлади. Фильм ғояси, ижодий жамоа ва иш жараёнинг ўзи ниҳоятда қайноқлиги билан ҳам бу фикримни асослашим мумкин», — дейди Жаҳонгир Аҳмедов.
«Ҳозирча фильм ғояси ҳақида маълумот бера олмайман, аммо фильмнинг ишчи номи ‘Супрақоқди’ эканини айтишим мумкин. Фильмда бош ролларни Матёқуб Матчонов ҳамда Раъно Ярашова ижро этади. Биласиз, ҳар бир фильмда дебютант актёр, актрисаларга ишониб, уларнинг қобилятига қараб, катта-кичик роллар бераман. Янги картинада ҳам Матёқуб Матчонов ва Раъно Ярашова тажрибаси соясида янги чеҳраларга катта имконият бермоқчиман», — дея қўшимча қилди режиссёр.
Фильмни тасвирга олиш жараёни қачон якунига етиб, тақдимоти қачон бўлиши ҳақида ҳозирча аниқ маълумот йўқ.
Изоҳ (0)