Туркманистон президентининг самолёти Атлантика океани устида аварияли вазиятга учради

Туркманистон президенти Гурбангули Бердимуҳаммедовнинг самолёти Атлантика океани устида аварияли вазиятга учради, дея хабар бермоқда «Gundogar.org».

31 октябрь куни Атлантика океани устидаги ҳаво ҳудудида «Туркманистон ҳаво йўллари»нинг мамлакат президентига хизмат қиладиган Boeing 777 самолёти билан аварияли ҳодиса юз берди.

Самолёт Ашхободга Атланта (АҚШ)дан йўловчисиз қайтаётган эди. Самолётга 5 сентябрдан буён АҚШда техник хизмат кўрсатилган. Атлантика океани устидан учиб ўтаётиб, экипаж двигателлардан бирида мой миқдори кескин камайиб кетганини сезиб қолган, шундан сўнг самолёт йўналишини ўзгартириб, Исландиянинг Рейкьявик аэропортига мажбуран қўнган.

Носозликлар бартараф этилгач, самолёт графикдан 46 соатга кечиккан ҳолда Ашхободга учиб кетган, натижада Гурбангули Бердимуҳаммедов Сочига Владимир Путин билан учрашиш учун захира самолётда парвоз қилишига тўғри келган.

Boeing вакиллари ҳам, Туркманистон расмий ОАВлари ҳам вазиятга ҳеч қандай изоҳ бергани йўқ.