Илҳом Мўминжонов «Навбаҳор»ни Олий Лигадан тушириб юборган илк мураббийга айланиши мумкин

Наманганнинг «Навбаҳор» футбол клубига бош мураббий этиб тайинланган Илҳом Мўминжонов жамоани Ўзбекистон Олий Лигасидан тушириб юборган биринчи мутахассис сифатида тарихда қолиши мумкин.

1992 йилдан буён ўтказиб келинаётган мамлакат чемпионатида «Навбаҳор» Олий Лигадан бирор марта ҳам тушиб кетмаган. 2016 йилги мавсум якунига 2 та тур қолганида жамоа 22 очко билан 16 клуб орасида 15-ўринни эгаллаб турибди.

«Жамоани бошқаришга розилик берганим рост. Бу клуб Ўзбекистон Олий Лигасидан ҳеч қачон тушиб кетмаган. Бизнинг вазифамиз уни элитада сақлаб қолишдан иборат. Бу борада мен бор кучимни ишга соламан», — деб фикр билдирган Илҳом Мўминжонов.

«Championat.asia»нинг «Футбол Экспресс» нашрига асосланиб ёзишича, мураббий Наманган вилояти ҳокими билан суҳбатда эркин ишлаши учун шароит қилиб беришларини сўраган. Ҳоким эса унга эркинлик яратиб бергани айтиб ўтилган.

Маълумот учун, Олий Лигада қолиши керак бўлган «Навбаҳор» сўнгги икки турни сафарда «Бунёдкор» ва «Андижон» клубларига қарши ўтказади. «Бунёдкор» мамлакат чемпионлиги учун, «Андижон» эса 1-лигага тушиб кетмаслик учун кураш олиб бораётган жамоалар ҳисобланади.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.