Forbes 2016 йилда энг кўп даромад олган қўшиқчи аёллар рейтингини тузди

Американинг Forbes журнали дунёнинг энг кўп даромад олувчи қўшиқчи аёллари анъанавий рейтингини эълон қилди.

Биринчи поғонада 2016 йилда 170 миллион доллар ишлаб топган америкалик Тэйлор Свифт жойлашди. Даромадининг катта қисмини унга 2015 йилда бошланган «1989» концерт тури ва рекламалардаги иштироки келтирди.

Иккинчи ўринни британиялик Адель эгаллади, йил якунларига кўра, унинг даромади 80,5 миллион долларга тенг бўлди. У «25» альбомининг сотувидан ва концерт фаолиятидан энг кўп пул ишлаб олди.

АҚШлик қўшиқчи Мадонна эса 76,5 миллион доллар билан учинчи поғонани банд этди. Ушбу даромаднинг катта қисми Rebel Heart гастрол тури орқасидан келди. Таъкидлаш жоиз, 2013 йилда у ушбу рейтингда етакчилик қилган эди.

Юқори ўнликка, шунингдек, Рианна (75 миллион доллар), Бейонсе (54 миллион доллар), Кэти Перри (41 миллион доллар), Женнифер Лопес (39,5 миллион доллар), Бритни Спирс (30,5 миллион доллар), Шанайя Твейн (27,5 миллион доллар) ва Селин Дион (27 миллион доллар) кирди.