Россиялик актёр Владимир Зельдин 101 ёшида вафот этди

Москвада театр ва кино актёри, Собиқ иттифоқ халқ артисти Владимир Зельдин 101 ёшида вафот этди, дея хабар бермоқда «РИА Новости».

Аввалроқ актёр оғир аҳволда Москвадаги клиникалардан бирига ётқизилгани хабар берилган эди. Унинг рафиқаси Иветта Зельдина сўзларига кўра, актёр уч ҳафта давомида ҳарбий госпиталда кўрикдан ўтган ва даволанган, у ердан уни Склифосовский номидаги илмий-тадқиқот марказига кўчиришган.

Владимир Зельдин 101 ёшини 10 февралда нишонлаган эди.

Унинг театрдаги ишлари ичида Лопе де Веганинг «Рақслар мураббийи» комедияси алоҳида ўрин эгаллайди. Зельдин унда минг мартадан ортиқ роль ижро этган. Кинода эса у «Карнавал кечаси», «Ўнта негр боласи», «31 июнь», «Ваня амаки» фильмлари орқали томошабинлар ёдида қолган. Зельдин, шунингдек, телесериаллар ва «Ералаш»да ҳам суратга тушган.

Владимир Зельдинни ҳақли равишда афсонавий одам деб аташарди. Чунки дунё театр тажрибасида 100 ёшида ҳам роль ижро этувчи бошқа актёр йўқ эди.