1993 йили «Қарға» жангари фильмини суратга олиш ишлари вақтида Брюс Лининг ўғли Брэндонни тасодифан отиб қўйган актёр Майкл Масси 64 ёшида АҚШда вафот этди. Бу ҳақда «Вести.ru» хабар бермоқда.
«Қарға» фильмида Масси ёвуз қаҳрамонлардан бирининг ролини ўйнаган. Сценарий бўйича, у 28 ёшли Брэндон Лига қараб ўқ узиши керак бўлган ва унинг тўппончаси ўқсиз патрон билан ўқланиши лозим эди.
Бироқ тўппонча стволига қопқоқ тиқилиб қолгани сабаб, ўқ узилган вақтда у учиб чиқиб Брюс Лининг ўғлига теккан. Брэндон 1993 йилнинг 31 март куни касалхонада вафот этган.
Масси бу ҳолатда айбдор эмас деб топилганига қарамай, у узоқ вақт тушкунликка тушиб қолган.
Кейинчалик у ўнлаб фильмларда (улар орасида «Ўргимчак одам: Юқори кучланиш», «Етти» кабилар бор), шунингдек, сериалларда («Риццоли ва Айлс» ва «24 соат») суратга тушган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)