Ўзбекистон меҳнат вазирига Шавкат Мирзиёев номига келган мурожаатни ҳал қилиш чорасини кўрмаган вазирлик ходимини ишдан ҳайдаш ҳақида топшириқ берилди

Ўзбекистон Меҳнат вазирлиги масъул ходими Андижон вилояти Шаҳрихон туманида яшовчи фуқародан Ўзбекистон бош вазири Шавкат Мирзиёев номига келган мурожаатни ҳал қилиш чорасини кўрмаган.

Шавкат Мирзиёевнинг Facebook’даги саҳифасида қолдирилган хабарга кўра, вазирлик масъул ходими «фуқаронинг мурожаатини телефон орқали боғланиш имкони бўлмаганлиги баҳонаси билан аноним деб топилишига сабабчи бўлган ҳамда масалани узил-кесил ҳал қилиш чорасини кўрмаган».

Шу муносабат билан Ўзбекистон меҳнат вазири Азиз Абдуҳакимовга «вазирлик масъул ходимини аниқлаш бўйича хизмат текшируви ўтказиш ва айбдор масъул ходим билан тузилган меҳнат шартномасини бекор қилиш» ҳақида топшириқ берилган.

Шаҳрихонлик фуқаро айнан қандай масалада бош вазирга мурожаат йўллаганига, охир-оқибат унинг мурожаати ижобий ҳал қилинган-қилинмаганига аниқлик киритилмаган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.