Ўзбекистон Президенти вазифасини бажарувчи Шавкат Мирзиёев 29 октябрь куни АҚШ давлат котибининг сиёсий масалалар бўйича ўринбосари Томас Шеннонни қабул қилди, дея хабар бермоқда ЎзА.
Шавкат Мирзиёев меҳмонни Ўзбекистонга ташрифи билан самимий қутлаб, Ислом Каримов вафоти муносабати билан чуқур ҳамдардлик изҳор этгани ва қўллаб-қувватлагани учун АҚШ президенти Барак Обама ва давлат котиби Жон Керрига самимий миннатдорлик билдирди.
Суҳбат давомида томонлар Ўзбекистон—АҚШ муносабатлари ўзаро ҳурмат ва ишонч, бир-бирининг манфаатларини инобатга олиш тамойиллари асосида изчил, муваффақиятли ривожланаётгани ва мустаҳкамланиб бораётганини таъкидлади.
Суҳбат чоғида Ўзбекистон ва АҚШ икки мамлакатларнинг узоқ муддатли манфаатларига мос келадиган барча истиқболли йўналишларда шериклик ва ҳамкорликни изчил мустаҳкамлаб, кенгайтириб бориш учун зарур имконият ва салоҳиятга эга экани қайд этилди.
«АҚШ делегацияси раҳбари Ўзбекистонда амалга оширилаётган кенг кўламли социал-иқтисодий ва ижтимоий-сиёсий ислоҳотларнинг, фуқаролик жамияти асосларини ва демократик қадриятларни мустаҳкамлашга қаратилган улкан ўзгаришларнинг ёрқин натижаларини юксак баҳолади», — деб ёзади ЎзА.
Томас Шеннон Ўзбекистонга ташрифи асносида ўзбек халқи бой тарихий-маданий ва маънавий меросга эга эканига яна бир бор амин бўлганини алоҳида қайд этган. Ёшлар, турли диний конфессиялар ва кенг жамоатчилик вакиллари билан очиқ ва самимий суҳбатлар, уларнинг эртанги кунга ишончи, интилувчанлиги, қатъияти ва ғайрат-шижоати меҳмонда катта таассурот қолдирган.
Томас Шеннон самимий қабул учун Шавкат Мирзиёевга миннатдорлик билдирди ва АҚШ раҳбарияти Ўзбекистон билан серқирра муносабатларни изчил ва барқарор ривожлантиришдан манфаатдор эканини таъкидлади. Суҳбат давомида икки ва кўп томонлама аҳамиятга эга бошқа долзарб масалалар ҳам кўриб чиқилди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)