Саудия Арабистони Ямандан учирилган баллистик ракетани тўхтатиб қолди

Саудия Арабистони Ҳаво ҳужумидан ҳимоя кучлари Ямандаги исёнчи-хусийлар томонидан Макка шаҳри йўналишида учирилган баллистик ракетани тўхтатиб қолишга муваффақ бўлди. Бу ҳақда «РИА Новости»га таяниб, «Корреспондент.net» хабар бермоқда.

Иттифоқ кучлари баллистик ракетани Макка шаҳридан 65 километр узоқликда йўқ қилди. Снаряд ҳеч қаерга зарар етказмади. Саудия Арабистони улар томонга учирилган ракетага жавобан ўт очди.

Хабарда қайд этилишича, хусийлар Саудия Арабистони ҳудудига ракета учирилишини тасдиқлади, аммо снаряднинг зарбаси Маккага эмас, Жидда шаҳри яқинида жойлашган ва қиролликнинг энг серқатнов Қирол Абдул-Азиз аэропортига қаратилган эди.