АҚШ бошчилигидаги халқаро аксилтеррор коалицияси Ҳарбий-ҳаво кучлари Ироқнинг Киркук шаҳридан 30 километр жанубда жойлашган Дакук аҳоли пунктидаги мотам маросимига зарба бермаган. Бу ҳақда ИШИД террорчилик гуруҳига қарши Ғарб коалицияси олиб бораётган Inherent Resolve операцияси қўмондонлиги матбуот хизмати маълум қилди, деб ёзади «ТАСС».
«Ҳозирги пайтда фуқаролар орасидаги қурбонларни коалициянинг ушбу ҳудуддаги бирорта ҳам зарбаси билан боғлай олмаймиз», — деб таъкидлади агентлик суҳбатдоши.
У, шунингдек, коалиция тинч аҳоли учун барча таҳдидларни минимум даражага етказганлигини маълум қилди.
Аввалроқ Россия Мудофаа вазирлиги расмий вакили Игорь Конашенков Россия разведка воситалари халқаро коалиция Дакукдаги мотам маросимига зарба берганини қайд этганлигини маълум қилган эди. Ҳужум оқибатида ўнлаб тинч аҳоли вакиллари, жумладан, аёллар ва болалар ҳалок бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)