Лондонда 2 қаватли автобус кўприкка бориб урилди

Лондон шимолида икки қаватли автобус кўприклардан бирининг остидан ўта олмади ва томига жиддий зарар етди. Авария оқибатида 26 киши жароҳат олди. Бу ҳақда «Корреспондент.net» хабар бермоқда.

Ҳодиса 22 октябрь, шанба куни Тоттенҳэмда содир бўлди. Жабрланганлардан 5 нафари касалхонага ётқизилди, 21 кишига жойида ёрдам кўрсатилди.

Авария туфайли автобуснинг иккинчи қаватидаги айрим йўловчилар қамалда қолди. Уларни қутқарув хизмати ходимлари бўлаклар орасидан чиқариб олди.