Германия парламенти — Бундестаг кўпчилик овоз билан мамлакат разведка хизмати (BND) ваколатларини кенгайтирувчи қонунни қабул қилди. Бу ҳақда «Интерфакс» хабар бермоқда.
Янги қонун хизматга Германия фуқаролари ортидан электрон кузатиш ҳуқуқини беради. Разведка интернетнинг барча каналлари орқали ўтувчи ахборотнинг 100 фоизигача кузатиб бориши мумкин.
Шунингдек, BND йўналишлари рўйхати ҳам кенгайтирилди: терроризм ва кибержиноятчиликдан ташқари, разведка «ташқи сиёсат ёки хавфсизлик сиёсати жиҳатидан аҳамиятга эга бошқа маълумотлар»ни тўплаш билан шуғулланиши лозим.
Қонун разведка устидан расмийлар назорати кучайтирилишини ҳам кўзда тутади. BND фаолиятининг маълум бир томонини назорат этиб борадиган 4 та комиссия тузилиши кутилмоқда.
Изоҳ (0)