Тошкентда 21 октябрь куни Ойбек кўчасининг август ойида ёпилган Нукус ва Туркистон кўчалари оралиғидаги қисмини қайта очиш бўйича тайёргарлик ишлари бошланди. Бу ҳақда «Газета.uz» хабар бермоқда.
Хабар беришларича, қарийб қуриб бўлинган фавворани бузиш ишлари жадал олиб борилмоқда, тротуар ёқасидан тўсиқлар олиб ташланган, ишчилар суғориш тизимларини демонтаж қилмоқда.
Ободонлаштириш бошқармаси ходимларининг сўзларига кўра, йўл 24 октябрь, душанба куниёқ автомобиллар ҳаракати учун очилиши мумкин.
Эслатиб ўтамиз, Ойбек кўчасининг бу қисми 19 август куни ёпилган эди. Тошкент шаҳар ҳокимлиги ушбу йўл «вокзалолди ҳудудларини янада ободонлаштириш, ушбу кўчада истиқомат қилаётган кўп сонли аҳолининг маданий ҳордиқ чиқаришларига қулай шарт-шароитлар яратиш мақсадида» ёпилганини маълум қилган эди.
Шаҳар ҳокимлиги қарийб қуриб бўлинган фаввора ва дам олиш ҳудудининг бузилиб, яна автойўлга айлантирилиши, ушбу кўчада истиқомат қилаётган кўп сонли аҳоли энди қаерда маданий ҳордиқ чиқариши борасида ҳозирча ҳеч бир изоҳ ё тушунтириш берганича йўқ.
Маълумот учун, октябрь ойи бошида Тошкентнинг Мустақиллик кўчаси билан кесишадиган бир қатор йўллар ҳам очилган эди. «Газета.uz»нинг қайд этишича, бу алоҳида йўналишлардаги йўл ҳолатини яхшилашга имкон берган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)