Япониянинг Mitsubishi Corporation ва Mitsubishi Hitachi Power Systems (MHPS) компаниялари Навоий иссиқлик электростанциясида қуввати 450 мегаватт бўлган иккинчи буғ-газ қурилмасини ўрнатади. Бу ҳақда UzDaily хабар бермоқда.
Япониянинг «Ривожланишга расмий ёрдам» дастури ва Ўзбекистон ҳукумати томонидан молиялаштириладиган лойиҳа доирасида MHPS буғ-газ қурилмасининг асосий қисмларини етказиб беради. Mitsubishi Corporation Туркиянинг Calik Enerji Sanayi ve Ticaret A.S. компанияси билан ҳамкорликда қолган қисмларни етказиб беради, шунингдек, жиҳозлар транспортировкаси, қурилиш ва монтаж ишлари учун жавоб беради.
Олдинроқ лойиҳа қиймати 520 миллион доллар эканлиги маълум қилинганди. Япония халқаро тараққиёт агентлиги (JICA) 360 миллион доллар миқдоридаги заём тақдим этади, Ўзбекистон реконструкция ва тараққиёт фонди эса 100 миллион доллар кредит ажратади. Шунингдек, «Ўзбекэнерго» акциядорлик жамияти ҳам лойиҳани молиялаштиришга ўз маблағларини йўналтиради.
Қурилманинг қурилиш ишлари 2019 йилда якунланиши кутилмоқда.
Изоҳ (0)