7 ёшли австралиялик бола пони сотиб олиш учун 2 йил лимонад сотди

Австралиянинг Квинсленд шаҳрида истиқомат қилувчи етти ёшли Себастьян Кент икки йил давомида лимонад сотиб, ўзига пони сотиб олди. Бу ҳақда TJournal хабар бермоқда.

Боланинг оиласи уйда лимонад тайёрлар эди. Себастьян ичимликнинг бир шишасини 20 центдан сота бошлади. Шаҳарликлар боланинг асл мақсадини билгач, уни оиласи билан маҳаллий байрамларга лимонад сотишга чақира бошлади.

Бундан ташқари, фермерлар Себастьяннинг оиласига ичимлик тайёрлаш учун бепул лимон етказа бошлади. Яна баъзи харидорлар ичимлик учун 20–100 доллар атрофида бера бошлади.

Натижада бола икки йил ичида 3 минг Австралия доллари тўплай олди.

11 октябрь куни ота-онаси Себастьянга Том лақабли пони совға қилди. Боланинг онаси Жулиана Кент боланинг жонивор билан биринчи учрашувини видеога туширди. Себастьян орзуси амалга ошганидан шу қадар хурсанд бўлдики, йиғлаб юборди ва отасини қучоқлади.