18 октябрь куни Фарғона вилояти ҳудудида Ўзбекистон Мудофаа вазирлигига тегишли Ми-171 вертолёти ҳалокатга учради. Расмий ахборотга кўра, ҳодиса оқибатида уч экипаж аъзоси ва Ўзбекистон Қуролли Кучларининг олти ҳарбий хизматчиси ҳалок бўлган. Авиаҳалокат сабабларини текшириш бўйича махсус комиссия тузилган.
Ми-171 вертолёти иштирокида бундан аввал ҳам авиаҳалокатлар юз берган. Уларнинг баъзилари билан қуйида танишиш мумкин.
Олтойдаги авиҳалокат
Россиянинг Олтой Республикасида 2009 йил 9 январь куни бортида 11 киши бўлган Ми-171 вертолёт ҳалокатга учради. «Газпромавиа» авиакомпаниясига тегишли ҳаво кемаси учувчиларнинг айби билан бошқарувни йўқотиб, тоғ қоясига бориб урилган. Ҳодиса оқибатида фақат 4 киши омон қолган.
Воркутадаги вертолёт ҳалокати
Россиянинг «Газпромавиа» авиакомпаниясига тегишли бошқа бир Ми-171 бортида 22 йўловчи ва экипажнинг уч аъзоси билан бирга 2009 йил 19 декабрь куни Россиянинг Воркута шаҳри аэропортига 4,5 километр қолганида фавқулодда қўнишни амалга оширишга мажбур бўлган. Ноқулай об-ҳаво шароити ва учувчиларнинг малакасизлиги сабаб юз берган ҳодиса оқибатида икки киши жиддий жароҳат олган, кейинроқ улардан бири вафот этган.
Боку яқинидаги вертолёт ҳалокати
2013 йил 11 февраль куни Боку шаҳри қирғоқлари яқинида Озарбайжон ҳарбий-ҳаво кучларига тегишли Ми-171 вертолёти қулади. Кучли туман оқибатида юз берган авиаҳалокат сабаб ҳаво кемаси бортида бўлган уч киши ҳалок бўлган.
Ханойдаги вертолёт ҳалокати
2014 йил 7 июль куни Вьетнам ҳарбий-ҳаво кучларига тегишли Ми-171 вертолёти Ханой шаҳри яқинида қулади. Вертолёт бортида 21 киши бўлган, улардан 16 нафари Вьетнам ҳарбий-ҳаво кучлари парашютчилари эди. Ҳодиса оқибатида 16 киши ҳалок бўлган.
Сичуандаги авиаҳодиса
2014 йил 22 июль куни Хитойнинг Сичуан вилоятида ҳарбийларга тегишли Ми-171 вертолёти қулади. Техник нуқсонлар сабаб юз берган авиаҳалокат оқибатида беш киши жабрланган.
Белграддаги вертолёт ҳалокати
Сербияда 2015 йил 14 март куни мамлакат жанубидан бемор чақалоқни пойтахтга олиб келаётган Ми-171 вертолёти Белграднинг Никола Тесла аэропорти яқинида қулади. Вертолёт бортида экипажнинг тўрт аъзоси ва икки тиббиёт ходими ҳам бўлган. Ҳалокатга ноқулай об-ҳаво шароити сабаб бўлган.
Жазоирдаги вертолёт ҳалокати
2016 йилнинг март ойида Жазоирнинг Регган туманида Ми-171 транспорт вертолёти ҳалокатга учради. Ҳалокат оқибатида бортда бўлганларнинг икки нафари омон қолган, 12 киши ҳалок бўлган. Авиаҳалокатга техник нуқсонлар сабаб бўлган.
Изоҳ (0)