Сурхондарёда шаҳар ва туман комиссиялари, бошқа алоқадор ташкилотлар, кенг жамоатчиликнинг таклиф ва тавсияларига асосан шу кунгача 2 мингдан ортиқ географик объектлар номи ўзгартирилди. Бу ҳақда ЎзА хабар бермоқда.
Жорий йилнинг ўтган даврида Географик объектларнинг номлари соҳасидаги ишларни тартибга солиш масалалари бўйича вилоят комиссияси жойлардан тушган таклифларни ўрганиб, 150 га яқин маҳалла, қишлоқ, кўча ва бошқа географик объектларга янги ном бериш ҳақида қарор қабул қилди.
Таҳлиллар шуни кўрсатмоқдаки, вилоятдаги айрим ҳудудларда муайян шахслар номи билан юритиладиган маҳалла, қишлоқ ва кўчалар ҳали ҳам мавжуд. Жойлардаги комиссиялар бундай ҳудудларни ўрганиб, уларни қайта номлаш таклифини илгари сурмоқда. Масалан, Денов туманидаги маҳаллалардан бири ҳозиргача Қўзи Каримов номи билан юритиб келинган. Юқорида зикр этилган вилоят комиссияси маҳаллани Баҳористон номи билан аташга қарор қилди. Ёки шу туманнинг Ҳайдар Муродов номидаги маҳалла фуқаролар йиғини Ўрикзор, Абдулла Набиев номидаги маҳалла фуқаролар йиғини Янги ҳаёт номлари билан алмаштирилди.
– Географик объектларнинг номлари соҳасидаги ишларни тартибга солиш масалалари бўйича вилоят комиссиясининг шу йил ўтказган йиғилишларида Денов туманидаги 140 маҳалла, кўча ва бошқа объектлар қайта номланди, – дейди вилоят ҳокимлигининг масъул ходими Даврон Бобоёров. – Қизириқ, Шўрчи ва Узун туманларининг ҳар бирида тўрттадан объект номи «Давлат тили ҳақида»ги қонун талабларига мослаштирилди.
Изоҳ (0)