3 октябрь куни Стокгольмда Нобель ҳафталиги бошланди. Тантанали ҳафталик физиология ва тиббиёт йўналишидаги мукофот ғолибларини эълон қилишдан бошланди, деб хабар беради «РБК».
Токио технология университети ходими Йошинори Осуми мукофотга муносиб кўрилди.
У ҳужайралар аутофагияси (ўзини ейиши) соҳасидаги кашфиётлари туфайли Нобелга сазовор бўлди.
«Бу кашфиётлар ҳужайралар ўз таркибини қандай утилизация қилиши бўйича тушунчаларимизга янги парадигма олиб кирди. Осумининг кашфиётлари аутофагиянинг кўпгина физиологик жараёнлар, жумладан, очликка мослашиш ва инфекцияларга жавоб беришдаги муҳим ўрнини тушунишга йўл очиб берди», — дейилади Нобель қўмитаси хабарномасида.
Осуми тиббиёт соҳасида Нобель мукофотига бир ўзи сазовор бўлган 39-номзоддир. 107 йил давомида кўпинча бир неча олимлардан иборат гуруҳлар мукофотни қўлга киритиб келган.
Изоҳ (0)