Трамп АҚШ НАТОнинг ўз молиявий мажбуриятларини бажарадиган аъзоларини ҳимоя қилиши керак деб ҳисоблайди

АҚШ президентлигига Республикачилар партиясидан номзод Дональд Трамп Вашингтон Шимолий Атлантика альянсга кирувчи давлатларни улар ўз молиявий мажбуриятларини бажарган тақдирда ҳимоя қилиши лозим деб ҳисоблайди. У тегишли баёнотни 27 сентябрь, сешанба куни Мелборн шаҳрида сайловчилар билан учрашувида маълум қилди, деб ёзади «ТАСС».

«НАТОга кирувчи 28 та мамлакатдан фақат бештаси мудофаа харажатлари бўйича ўз мажбуриятларини бажаради», — деб таъкидлади миллиардер. «Менга НАТО ёқади, бироқ ҳисоблар бўйича тўлаш лозим», — дея қўшимча қилди у.

Республикачи номзод альянс охирги вақтларда унинг баёнотларидан сўнг терроризмга қарши курашга кўпроқ эътибор қарата бошлаганлигини таъкидлади.

НАТОга аъзо бошқа давлатлар ҳақида гапирар экан, Трамп: «Биз уларни ҳимоя қилишимизни исташади, бироқ бунинг учун ҳисоблар бўйича тўлаш лозим. Бунга уларнинг кўпчилиги қодир. Ҳозир эса тўлаши лозим бўлган 28 давлатдан бештаси тўловни амалга оширмоқда», — деди.