Баъзан шундай бўладики, бир қарашда ажойиб гўшт бўлагини сотиб оласиз, аммо у чандирли ва қаттиқ бўлиб чиқади. Шунда ҳам уни ташлаб юборишга шошилманг. Яхши чиқмаган гўштни «қутқариб қолиб», уни майин ва сувли қилиб пишириш иложи бор.
Энг яхши ечим — маринадлаш. Гўштни ўртача катталикдаги бўлакларга бўлинг, устидан ҳалқа қилиб тўғралган пиёз қатламини қўйиб чиқинг. 1 ош қошиқ кучсиз сирка эритмаси, яримта лимон суви (1—1,5 кг учун)дан қуйиб, устини зичлаб ёпиб қўйинг ва тахминан бир соатга қолдиринг. Шундан сўнг гўштни бемалол қовуриб есангиз бўлади.
Ушбу вазиятда сизга асқотадиган яна бир кутилмаган ёрдамчи — хантал. Гўшт бўлагига хантал суриб, бир—бир ярим соатга қолдиринг, сўнг хантални ювиб ташлаб, гўштни пиширишга киринг — мазали чиқиши кафолатланган.
Агар совитгичда тузланган бодринг ёки карам бўлса — яна соз: улар мол гўштини юмшатишда сизга қўл келади.
Овқат шинавандаларига ёқиб тушадиган яна бир усул — сояли маринад. Гўштни соус солинган идишда бир кечага қолдиринг (албатта совитгич ичида), шунда ажойиб хитойча гўшт тайёрлашингиз мумкин.
Изоҳ (0)