Бангладешда бир оиланинг иккитадан ортиқ автомобилга эгалик қилишига чеклов жорий этилади

Бангладеш пойтахти Даккадаги доимий автомобиль тирбандликлари мамлакат ҳукуматини бир оила эга бўлиши мумкин автомобиллар сонига чеклов жорий этишга ундамоқда. Автомобиль транспорти вазири Убайдулла Қодирга кўра, пойтахтдаги оилалар икки машина билан кифояланишига тўғри келиши эҳтимолдан ҳоли эмас, дея хабар беради «ТАСС».

«Ҳар бир оилага тўғри келадиган машиналар сонини чеклаш тўғрисидаги низом автотранспорт тўғрисидаги қонун лойиҳасига киритилди. Яқин орада бу қонун якуний тасдиқлаш учун ҳукуматга тақдим этилади, шундан сўнг парламентда муҳокама этилади», — дейди вазир.

«Шошилинч чоралар кўриш зарур, чунки ҳозирнинг ўзида Дакка дунёнинг нафақат одамлар, балки машиналар ҳам энг зич жойлашган шаҳарларидан бирига айланди. Бу эса, ўз навбатида, жиддий иқтисодий ва экологик муаммоларга олиб келмоқда», — дея таъкидлади вазир.

Вазирлик маълумотларига кўра, пойтахтда автомобиль паркининг ўсиш суръати умуммилий кўрсаткичлардан бир неча баробар кўп. Жумладан, 2015 йили Бангладешда харид қилинган 21 минг хусусий енгил автомобилдан 18,5 минги Дакка ҳиссасига тўғри келди.

Натижада ўтган йили хусусий машиналар пойтахт кўчаларидаги 70 фоиздан ошиқ бўш жойни эгаллади, автомобиль тирбандликлари келтираётган зарар эса мамлакат йиллик ялпи ички маҳсулотининг салкам 6 фоизини ташкил этмоқда.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.