Фитнес залида йўриқчи бўлиб ишлайдиган 27-ёшли Элли Фарнфилд бир ўзи Лондон поездида кетаётганда тўсатдан ҳушидан кетди. У касалхонада кўзини очди ва бу ерга қандай келиб қолганини эслолмади. Бироқ ёнида турган мактуб орқали унга барчаси аён бўлди, деб ҳикоя қилади AdMe.
Мактубда, жумладан, шундай дейилганди:
«Элеонора, буни ўқиётганингда анча ўзингга келиб қолган бўласан, деб ўйлайман. Поездда тутқаноқ хуружи юз берди ва сени у ердан олиб тушдим. Ёнингда қололмаганим учун жуда афсусдаман, бироқ мана бу тетик тортишинг учун қаҳва ва уйга таксида етиб олишинг учун 10 фунт. Кечир, ёнимда бошқа пул қолмаганди, шу сабабли шу атрофда яшайсан деб умид қиламан.
Телефонингдаги алоқалар рўйхатида бўлган кишилар билан боғландим, тиббий ёрдам йўлга чиқди, унгача эса темир йўл ходимлари билан бўлиб турасан. Тезда соғайиб кетишингни тилаб, Том».
Элли мазкур мактуб фотосини ижтимоий тармоқдаги саҳифасига жойлаштирди ва миннатдорчилик билдириш учун сирли Томни топишда ёрдам сўради. У ҳаётини сақлаб қолгани эҳтимолдан холи бўлмаган Томни ҳозирча топмаган бўлса-да, халоскори билан барибир кўришишига умид қилмоқда.
Изоҳ (0)