Амударё туманининг (Қорақалпоғистон Республикаси) «Бўзёп» овул фуқаролар йиғини ҳудудидаги «Яримчи» сув тақсимлаш станцияси қайта реконструкция қилиниб, фойдаланишга топширилди. Бунинг натижасида ҳудуддаги 422 хонадон тоза ичимлик суви билан узлуксиз таъминланди, дея хабар берди ЎзА.
Осиё тараққиёт банки томонидан 1 миллион 152 минг доллар миқдорида молиялаштирилган мазкур лойиҳа бўйича кенг кўламдаги қурилиш-таъмирлаш ишлари тумандаги «2-кўчма механизациялашган колонна» масъулияти чекланган жамияти қурувчилари томонидан амалга оширилди.
Аҳолининг ичимлик сувга бўлган талабини қондиришга йўналтирилган ушбу лойиҳани бажариш ўтган йилнинг апрель ойида бошланган эди. Қисқа вақт давомида насос станцияси биносини реконструкция қилиш баробарида 21 километр узунликдаги ўрта босимдаги ҳамда хонадонларга борадиган 11,7 километр узунликдаги сув тармоқлари тортилди. Реконструкция ишларидан сўнг сув тақсимлаш станциясига замонавий насослар ўрнатилди.
Аҳолини сифатли ичимлик суви билан таъминлашга қаратилган дастур асосида Хўжайли, Кегейли, Шуманай ва Беруний туманларида ҳам шу каби сув тақсимлаш станцияларини реконструкция ва таъмирлаш ишлари изчил олиб борилмоқда.
Изоҳ (0)