Тошкентнинг Фарғона йўли кўчасида жойлашган, шаҳардаги энг қадимийларидан бири ҳисобланган жомеъ масжидининг янгиланган биноси қурилиши тез кунларда ниҳоясига етади. Бу ҳақда Ўзбекистон Биринчи Президенти Ислом Каримовнинг қизи Лола Каримова-Тиллаева Instagram’даги саҳифасида маълум қилди.
«Масжид биноси 2015 йил баҳорида содир бўлган ёнғин натижасида деярли буткул вайрон бўлган эди. Ушбу масжидни қайта тиклашдек савобли ишни бажариш бахтини мен ва турмуш ўртоғимга насиб айлагани учун меҳрибон Парвардигорга беадад шукроналар ва ҳамду-санолар айтаман», — деб ёзди Лола Каримова-Тиллаева.
Лола Каримова-Тиллаеванинг қайд этишича, Ўзбекистон диний уламолари ҳамда кенг жамоатчилик таклифига биноан намозгоҳга «Ислом ота» жомеъ масжиди номи берилди. «Аллоҳ таолодан раҳматли отамнинг диний қадриятларни тиклаш, Ватан озодлиги, юрт тинчлиги ва эл фаровонлиги йўлидаги солиҳ амалларини қабул айлаб, Ўз мағфиратига олиши ҳамда охиратларини обод этишини илтижо қиламиз», — деб ёзади у.
Масжидни тиклаш ишлари 2015 йилнинг охирида бошланиб, тўққиз ой давом этди. Қурилиш-таъмирлаш ишларидан сўнг масжиднинг умумий майдони қарийб икки баробар ошган бўлиб, 2900 квадрат метрдан 5400 квадрат метргача катталашди. Энди масжидда 560 киши намоз амалларини адо этиши мумкин.
Масжиднинг асосий биноси баландлиги 22,1 метрни ташкил этувчи гумбаз, 36,65 метрлик катта минора ва ҳар бирининг баландлиги 10,82 метр бўлган тўртта кичик миноралардан иборат. Мажмуанинг лойиҳалаштириш ва қайта тиклаш ишларида меъмор ва қурувчилар Марказий Осиёда масжидлар қуриш қоидаларига тўлиқ амал қилган.
Масжид биносининг ички ва ташқи томонларидаги кўплаб нақшлар ҳам Марказий Осиё меъморчилик мактаби анъаналарига мансуб ҳолда яратилган. Масжид ичкарисида гумбаз ва деворларга Қуръони Карим оятлари малакали ҳаттотлар томонидан ганч билан ишланиб ёзилган.
Янги қурилган мажмуада кутубхона ва таҳорат хоналари ҳам барпо этилди. Имконияти чекланган инсонлар учун зарур ускуналар, ҳавони тозалаб берувчи қурилма ва кондиционерлар тизими мослаб ўрнатилди. Масжид ҳовлисида дам олиш жойлари ҳам яратилди.
Изоҳ (0)