Қозоғистон президенти Нурсултон Назарбоев 12 сентябрь, душанба куни Самарқандда Ўзбекистон Биринчи Президенти Ислом Каримов қабрига гуллар қўйди. Бу ҳақда Қозоғистон президенти матбуот хизмати хабар бермоқда.
Йиғилганларга мурожаат қиларкан, Нурсултон Назарбоев уни Ислом Каримов билан кўп йиллик мустаҳкам дўстлик ва самимий муносабатлар боғлаб турганини таъкидлаб ўтди.
«Ўзбекистоннинг кейинги авлодлари, давлат раҳбарлари Ислом Каримовни ҳамиша ёдда сақлашларига ишончим комил. Унинг бой мероси, давлатчилик фаолияти натижалари авлодлар томонидан ўрганилади, қилган ишлари эса ўзбек халқи тарихига олтин ҳарфлар билан битилади. У бутун жаҳонга машҳур етакчи эди, мамлакатнинг оёққа туриши ва иқтисодиётининг ўсиши, халқ фаровонлигининг ошиши унинг номи билан боғлиқ. Биз буюк инсонни йўқотдик», — деди Қозоғистон президенти.
Нурсултон Назарбоев биродар Ўзбекистон ва Қозоғистон ўртасидаги тарихий ва стратегик муносабатларнинг мустаҳкамланишида Ўзбекистон Биринчи Президентининг тенгсиз ўрни борлигини ҳам алоҳида қайд этиб ўтди.
«Қозоқ ва ўзбек халқлари ҳар доим бир-бирига елкадош бўлган. Биз Ислом Абдуғаниевич билан 1998 йили Хожа Аҳмад Yassaviy мақбараси олдида абадий дўстлик тўғрисидаги битимни имзолаганмиз ва бизнинг муносабатларимиз ҳар доим шу битимга асосланган. Қозоғистон ҳар доим ўзбек халқининг ёнида бўлган ва шундай бўлиб қолади», — дея қўшимча қилди Қозоғистон президенти Нурсултон Назарбоев.
«Нурсултон Назарбоев Ислом Каримовнинг оила аъзолари билан учрашди ҳамда уларга Қозоғистон халқи номидан ва шахсан ўз номидан чуқур ҳамдардлик изҳор қилди», — дея қўшимча қилинади Қозоғистон президенти матбуот хизмати хабарида.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)