Самарқанддаги Форумлар мажмуасида Ўзбекистон Президенти вазифасини бажарувчи Шавкат Мирзиёев ва Қозоғистон президенти Нурсултон Назарбоевнинг учрашуви бўлиб ўтди. Бу ҳақда ЎзА хабар бермоқда.
«Ўзбекистон Президенти вазифасини бажарувчи Шавкат Мирзиёев Қозоғистон президенти Нурсултон Назарбоевга халқимизнинг буюк фарзанди, Ўзбекистоннинг Биринчи Президенти Ислом Каримов хотирасига ҳурмат бажо келтириш мақсадида мамлакатимизга ташриф буюргани учун миннатдорлик билдирди. Ушбу ташриф меҳр-оқибат ва аҳиллик айёми — Қурбон ҳайити кунларида амалга оширилгани Ислом Каримов билан Нурсултон Назарбоевнинг муносабатлари, дўстлиги юксак даражада бўлганини намоён этди. Бу дўстлик халқларимиз ўртасидаги дўстлик, яхши қўшничилик ва ҳамкорликка асос бўлганини, бундай яқин муносабатлар изчил давом эттирилажагини алоҳида таъкидлади», — дейилади ЎзА ахборотида.
Нурсултон Назарбоев Ўзбекистон Биринчи Президенти Ислом Каримов Ўзбекистоннинг мустақиллиги, иқтисодиёти ва сиёсатини белгилаб берган улуғ давлат арбоби, ўзбек халқининг буюк фарзанди, дунё миқёсидаги етакчи бўлганини алоҳида таъкидлади. Ислом Каримов халқаро анжуманларда ҳар доим ҳал қилувчи ўрин тутганини, энг мураккаб пайтларда ҳам тинчлик ва барқарорликни таъминлагани, Қозоғистон ва Ўзбекистон ҳамкорлиги ривожига улкан ҳисса қўшганини ёдга олди. Ўзбекистон ва Қозоғистон ўртасидаги бу алоқаларни изчил давом эттириш муҳим аҳамиятга эга эканини қайд этди.
Қозоғистон президенти Нурсултон Назарбоев Самарқандда Ислом Каримов хотирасига ҳурмат бажо келтирди
Фото: Қозоғистон президенти Нурсултон Назарбоев Самарқандда Ислом Каримов қабрига гуллар қўйди
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)