КХДР миллий ярашув кенгаши ўз чиқишларида мамлакат раҳбарияти ҳаракатларини «ақлсизлик ва мустабидлик», вазиятни эса «фавқулодда» деб атаган Жанубий Корея президенти Пак Кин Хени кескин танқид остига олди. Бу ҳақда «ТАСС» хабар бермоқда.
«КХДР ижтимоий тизимини баҳолашда буткул оми эканлигини намойиш этаётган Пак Кин Хе беъмани фикрларни билдиришдан тийилиши лозим. Халқ республикаси аввалгидек тараққиёт йўлидан дадил одимлашда давом этиб, параллель равишда иқтисодиётни ривожлантириш ва ядро кучларини мустаҳкамлашни амалга оширмоқда. Жанубий Корея раҳбари Шимолдаги ҳамюртлари билан қарама-қаршиликни кучайтиришга қаратилган сиёсати учун жавоб беришига тўғри келади», — дейилади кенгаш баёнотида.
Шимолий Кореянинг марказий «Нодон Синмун» газетаси Пак Кин Хени Қўшма Штатлар билан ҳамкорлиги ва Пхеньян 9 сентябрда ўтказган ядро синовини қоралагани учун танқид қилди. «АҚШ билан биргаликда КХДРни яккалаш ва бўғишга ҳаракат қилаётган Пак Кин Хе замонавий дунёдаги янги йўналишларни ҳис этмаётган кўринади. Вашингтон бир томонлама тартибда КХДРни ядро товламачилигига дучор қилиш имкониятига эга бўлган даврлар ўтиб кетди», — дейилади газета мақоласида.
Изоҳ (0)