Халқаро миграция ташкилоти (МХТ) Покистонда зўравонлик ва таъқибларга дуч келаётган афғонистонликларнинг оммавий равишда ватанига қайтаётганидан хавотир билдирди. Ташкилот расмий вакили Итайи Виририга кўра, Афғонистонга йил охиригача 600 минггача киши қайтиши, бу эса йирик гуманитар инқирозга сабаб бўлиши мумкин. Бу ҳақда «ТАСС» хабар бермоқда.
«Мисли кўрилмаган миқдордаги афғонистонликлар тобора кучайиб бораётган зўравонлик, асоссиз қўлга олиш, ҳибсда сақлаш ва таъқиб этишнинг бошқа шаклларидан қочмоқда. Уларга кетиши учун тахминан 48 соат берилади, шошилинчда бор-будларини сотиб, уйларини тарк этмоқда. Баъзан Афғонистонга кийим-кечакдан бошқа ҳеч вақосиз қайтади. Қиш яқинлашаётганини инобатга олганда, бу инсонлар ўта мушкул аҳволда», — таъкидлади Вирири.
МХТнинг Афғонистондаги миссияси раҳбари Лоуренс Хартнинг билдиришича, ташкилот ресурслари юртига қайтаётган афғонистонликларнинг атиги бешдан бир қисмига ёрдам бериш учун етади. БМТ 7 сентябрь куни жаҳон ҳамжамиятига келгуси уч ой учун 150 миллион доллар ажратишни сўраб мурожаат этди. Мазкур маблағ қайтувчиларни ётоқ ва озиқ-овқат билан таъминлаш, тиббий ёрдам кўрсатиш учун сарфланади.
Изоҳ (0)