Ўзбекистон томони КХДРни провокацион ҳаракатларни тўхтатишга чақиради. Бу ҳақда Ўзбекистон Ташқи ишлар вазирлиги ҳузуридаги «Жаҳон» ахборот агентлигининг 11 сентябрь куни эълон қилган ахборотида сўз боради.
«Марказий Осиёда ядро қуролидан ҳоли ҳудудни ташкил этиш ташаббускори ҳисобланган Ўзбекистон Ядро қуролини тарқатмаслик тўғрисидаги шартнома талабларига қатъий риоя этилиши тарафдоридир ҳамда ядро қуролини қўллаш таҳдидини камайтириш масалаларига катта эътибор қаратади», — дейилади «Жаҳон» АА ахборотида.
«Шундан келиб чиқиб, Ўзбекистонда КХДР томонидан 2016 йилнинг 9 сентябрь куни БМТ Хавфсизлик кенгаши резолюцияларининг қўпол равишда бузилиши ҳамда минтақа ва умуман жаҳон миқёсида хавфсизликка бевосита таҳдид ҳисобланган навбатдаги ядровий синовларнинг ўтказилгани ташвиш билан қабул қилинди», — дейилади агентлик ахборотида.
«Ўзбекистон томони расмий Пхеньянни кескинликнинг ўсишига олиб келувчи провокацион ҳаракатларни тўхтатишга ва мавжуд зиддиятларни тинч дипломатик воситалар орқали ҳал қилишга чақиради», — дея қўшимча қилинган «Жаҳон» ахборотида.
Эслатиб ўтамиз, 9 сентябрь куни Шимолий Корея ўз тарихидаги бешинчи ядровий синовни ўтказди. Мутахассисларнинг сўзларига кўра, бу мамлакат тарихидаги энг йирик ядровий синов бўлган, КХДР раҳбарияти эса энди ядровий каллакларни баллистик ракеталарга ўрната олишини маълум қилди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)