Флорида штатидан сайланган республикачи конгрессмен Дэвид Жолли Конгресс вакиллар палатаси йиғилишига Зика вирусини тарқатувчи чивин тўла шиша идиш билан келди. Шу тариқа у ҳамкасбларини вирусга қарши кураш учун маблағ ажратилишига тўсқинлик қилаётган партиялараро келишмовчиликларни бартараф этишга кўндирмоқчи бўлди. Бу ҳақда «ТАСС» хабар бермоқда.
«Бу ерга Флоридадан Зика вирусини тарқатишга қодир юзлаб чивинларни олиб келдим. Улар кечиктириб бўлмас ҳаракатлар ва Флорида аҳолиси қўрқуви сабабидир. Биз эса беҳуда вақт йўқотяпмиз», — дея таъкидлади Жолли.
Флорида ҳудудида Зика вируси тарқалаётган АҚШдаги ягона штат бўлиб қолмоқда. Ҳозирда бу ерда касаллик юқтирилиши билан боғлиқ 56 ҳолат қайд этилган.
Шифокорлар ва экспертлар вирусга қарши кураш учун маблағ етишмовчилигидан хавотир билдирмоқда. Конгрессда эса республикачилар ва демократлар ўртасида молиялаштириш ҳажми ҳамда манбалари юзасидан ашаддий баҳслар давом этмоқда.
Изоҳ (0)