Ўзбекистон Ёшлар театри саҳнасида 10—11 сентябрь кунлари немис тилида сўзлашувчи ўзбекистонлик ҳаваскор театр гуруҳларининг анъанавий театр фестивали бўлиб ўтади. Бу ҳақда Германиянинг Ўзбекистондаги элчихонаси матбуот хизмати «Дарё»га маълум қилди.
Фестиваль доирасида Тошкент, Фарғона, Самарқанд ва Бухоро шаҳарларидаги Wiedergeburt немис маданияти марказларининг ҳаваскор театр гуруҳлари сўнгги бир йил давомида ўзлаштирган асарларни саҳнада намойиш этади.
Элчихона матбуот хизматининг қайд этишича, театр фестивали арафасида ушбу гуруҳлар германиялик театршунос-педагог Ёахим Бюркерт иштирокидаги семинар машғулотларда ўз маҳоратларини синовдан ўтказиш имкониятига эга бўлишди.
Фестивальни «Автострада» фильми ва «Охири йўқ йўл» ҳикояси мотивлари асосида тайёрланган ва инсон ҳаётининг турли бекатларини кўрсатиб берадиган «Манзил» номли саҳна асари ижроси билан бухоролик ҳаваскор театр гуруҳи бошлаб беради.
Самарқанд вакиллари эса болаларнинг жамиятдаги ўзаро муносабатлари, уларнинг ўзаро тил топа олиш-олмасликлари ҳақида ҳикоя қилувчи «Ёзги лагер» номли асар билан саҳнага чиқади.
Фестивальнинг иккинчи куни фарғоналиклар вилоят немис маданияти маркази аъзоси Ойбек Нишоновнинг саратон касаллигига чалинган инсонлар ҳақидаги «Муросаларсиз» саҳна асарини намойиш этади.
Тошкент шаҳри вакиллари тақдим этадиган «Кекса аёлнинг ташрифи» номли асар швейцариялик драматург Фридрих Дюрренматт қаламига мансуб бўлиб, унда ўзининг собиқ севгилисидан қасос олмоқчи бўлган кекса мультимиллиардер аёл Клара Саханассян ҳақида ҳикоя қилинади.
«Ушбу тадбир авваламбор Тошкент шаҳридаги мактаб, лицей, коллеж ва олийгоҳларнинг немис тилини яхши биладиган ўқувчи ва талабаларига мўлжалланган. Фестиваль 10 ва 11 сентябрь кунлари соат 16:00 да бошланади. Спектаклларга кириш бепул», — дейилади элчихона ахборотида.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)