Танловдан ташқари дастурнинг асосий премьераси, таниқли америкалик актёр Мэл Гибсоннинг янги режиссёрлик иши — «Виждон амри билан» (Hachsaw Ridge) фильми 73-Венеция кинофестивалида 4 сентябрь, якшанба куни намойиш этилди, деб ёзади «ТАСС».
Гибсоннинг сўнгги фильми — «Апокалипсис» (Apocalypto) чиққанидан буён роппа-роса ўн йил ўтди. Бу вақт давомида Гибсон фаол тарзда суратга тушишда давом этди. «Виждон амри билан» — унинг «Исо эҳтирослари» (The Passion of the Christ, 2004), «Шерюрак» (Braveheart, 1995), «Юзсиз одам» (Man Without a Face, 1993) ва «Апокалипсис»дан кейинги бешинчи режиссёрлик иши.
Фильм уруш қаҳрамони, Ҳурмат Медали соҳиби, реал персонаж Десмонд Досс ҳақида ҳикоя қилади. У маънавий мулоҳазаларга кўра, шу жумладан, диний эътиқоди юзасидан, қўлига қурол олишдан бош тортади ва дала шифокорига айланиб, ўнлаб кишилар ҳаётини асраб қолади. Картина марказидан Иккинчи Жаҳон урушининг Окинава учун кураш эпизоди ўрин олган.
Эслатиб ўтамиз, Венеция кинофестивалида унинг тарихида илк маротаба сериал намойиш этишди, у режиссёр Паоло Соррентинонинг «Ёш папа» сериали бўлди.
Изоҳ (0)