Беларусь терма жамоаси аъзоларидан бири Рио–2016 Паралимпия ўйинлари очилиш маросимида Россия байроғини кўтариб чиққани учун Халқаро паралимпия қўмитаси (ХПҚ) ушбу мамлакат делегациясига нисбатан суриштирув ишларини олиб боради. Бу ҳақда «Sport.tut.by» хабар бермоқда.
Беларусь делегациясининг эркак аъзосидан Россия байроғини олиб қўйишгунича у бир неча 10 метр юришга эришди. ХПҚ қоидабузарнинг шахсини аниқлади. Энди унга нисбатан интизомий чоралар кўрилиши кутилмоқда.
Халқаро паралимпия қўмитаси Халқаро антидопинг агентлиги (WADA)нинг мустақил комиссияси раҳбари Ричард Макларен томонидан спортдаги допинг ҳақида тақдим қилинган ҳисоботидан сўнг 35 нафар россиялик имконияти чекланган спортчиларни халқаро мусобақалардан четлатишга қарор қилганди.
23 август куни Спорт арбитраж суди (CAS) Россия паралимпия термасига 7–18 сентябрь кунлари Рио-де-Жанейрода бўлиб ўтадиган Паралимпия ўйинларида иштирок этиш учун Халқаро паралимпия қўмитасининг россияликларга нисбатан қўллаган қарорига апелляциясини қониқтирмаган эди.
Шундан сўнг Беларусь миллий паралимпия қўмитаси раиси Олег Шепель Паралимпия ўйинларининг очилиш маросимида нафақат Беларусь, балки Россия байроғи ҳам кўтарилиши ҳақида айтиб ўтганди. Бироқ ХПҚ Беларусь термасига бу ишни амалга оширишни тақиқлаганди.
Изоҳ (0)