Ғузорнинг «Шўртан» клуби ўз вақтида жамоа сафида тўп сурган сербиялик футболчи — Урош Милосавлевич билан шартнома мажбуриятларини ўз вақтида бажармагани учун жазога тортилди. Бу ҳақда 4 сентябрь, якшанба ЎзПФЛ матбуот хизмати хабар бермоқда.
«Собиқ футболчиси Урош Милосавлевич билан шартнома мажбуриятларини ўз вақтида бажармагани муносабати билан ва ФИФА Тартиб-интизом қўмитасининг 2015 йил 9 октябрдаги қароридан келиб чиқиб, ‘Шўртан’ клубидан 3 очко олиб ташланади», — дейилади ЎзПФЛ матбуот хизмати хабарида.
Қайд этишларича, «Шўртан»дан 3 очко олиб ташлаш ҳақидаги ҳужжат, ФИФА Тартиб-интизом қўмитасининг 2015 йил 9 октябрдаги қарори ва Ўзбекистон Футбол Федерациясининг 2016 йил 25 августдаги мажлиси баёнига мувофиқ, Ўзбекистон Футбол Федерацияси Ижроия қўмита бюроси томонидан қарор қабул қилинган.
«Шўртан» клуби Урош Милосавлевич билан имзолаган шартномасидаги айнан қайси мажбуриятларини бажармаганига аниқлик киритилмаган.
Футбол бўйича Ўзбекистон Олий Лигаси 2016 йилги мавсумида «Шўртан» клуби ҳозиргача 20 та ўйин ўтказиб, 7 ўйинда ғалаба қозонган, 2 ўйинда дуранга эришган ва 11 учрашувда мағлуб бўлган эди. ЎФФ қарори эълон қилинишидан аввал жамоа Олий Лигада 16 жамоа орасида 23 очко билан 9-ўринда бораётган эди.
Айни вақтда ЎзПФЛ сайтидаги Олий Лига жадвалида «Шўртан»дан 3 очко олиб ташлангани ва жамоа 11-ўринга тушиб қолганини кўриш мумкин.
Маълумот учун, сербиялик Урош Милосавлевич 2011 йилги мавсум биринчи ярмида «Шўртан» шарафини ҳимоя қилган. Футболчи ўша йил ёзда Ўзбекистоннинг бошқа бир клуби — «Бунёдкор» аъзосига айланган. Ҳозирда 32 ёшда бўлган Урош Милосавлевич футболчилик фаолиятини якунлаган ва футбол агенти сифатида фаолият олиб боради.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)