Ўзбекистондаги барча таълим масканларида 4 сентябрь куни Ўзбекистон Биринчи Президенти Ислом Каримовнинг порлоқ хотирасига бағишланган «Хотира дарслари» бўлиб ўтди. Бу ҳақда ЎзА хабар бермоқда.
Биринчи Президентнинг Ватан равнақи, халқ олдидаги хизматларини ёдга олиш мақсадида ташкил этилган мазкур дарсларда турли вазирлик ва идоралар, жамоат ташкилотларининг мутасаддилари, профессор-ўқитувчилар, маънавият тарғиботчилари, тарихчи олимлар, ёзувчи ва шоирлар иштирок этди.
Ўқувчилар Биринчи Президентнинг таржимаи ҳоли билан таништирилгач, махсус мониторда намойиш этилган фильмда Ислом Каримовнинг Ўзбекистон мустақиллигининг асосчиси, мамлакат мустақил тараққиёт дастурини ишлаб чиққан ва миллий тараққиёт йўлини белгилаб берган атоқли давлат арбоби, Ўзбекистонда амалга оширилган улкан ислоҳотлар, тарихий ўзгаришларнинг ташаббускори ва раҳнамоси сифатидаги хизматлари ҳақида сўз юритилди.
Ўзбекистоннинг барча таълим масканларида бўлгани каби академик лицей ва касб-ҳунар коллежларида ўтган «Хотира дарслари»да ҳам Биринчи Президентнинг Ўзбекистон буюк келажаги, тинчлиги ва осойишталиги, халқ фаровонлиги йўлидаги фидокорона меҳнатлари ҳақида ҳикоя қилинди.
Жумладан, Тошкент темир йўл муҳандислари институтида ҳам «Хотира дарслари» замонавий ахборот, педагогик технологиялардан кенг фойдаланилган ҳолда ҳаётий мисоллар ёрдамида ўтилди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)