АҚШнинг Нью-Йорк штати расмийлари Британиянинг The Beatles асосчиларидан бири, гуруҳ етакчиси – Жон Леннонни 1980 йилда отиб ўлдирган Марк Дэвид Чэпменга тўққизинчи марта муддатидан аввал қамоқдан чиқиш илтимосини рад этди. Бу ҳақда 61 ёшли жиноятчининг арзномасини кўриб чиққан тегишли комиссиянинг чоп этилган баёнотида маълум қилинди, деб хабар бермоқда «ТАСС».
Чэпмен уюштирган қотиллиги учун Нью-Йорк штатининг ғарбий қисмидаги қаттиқ тартибли жазони ўташ муассасасида умрбод жазо муддатини ўтамоқда. У қилган ишидан афсусда эканини маълум қилиб, доимий равишда муддатидан аввал озодликка чиқиш ҳақида илтимос қилади. Сўнгги бор у 2014 йилда арзнома берган. Кейинги имконият Чэпменга 2018 йилда берилади.
Жон Ленноннинг беваси Йоко Оно марҳум турмуш ўртоғи қотилининг озодликка чиқишига бир неча бор қарши чиққан. Аёлнинг таъкидлашича, қотил қамоқдан чиқса, ўзи ва икки нафар ўғли учун катта хавф туғдиради.
Марк Дэвид Чэпмен 1980 йилнинг 8 декабрида, Нью-Йорк марказидаги «Дакота» номли бино олдида The Beatles етакчисини отиб ўлдирганди. Леннон овоз ёзиш студиясидан уйга қайтаётганда қотил тўппончадан унга қарата беш марта ўқ узган.
Изоҳ (0)