AQShning Nyu-York shtati rasmiylari Britaniyaning The Beatles asoschilaridan biri, guruh yetakchisi – Jon Lennonni 1980-yilda otib o‘ldirgan Mark Devid Chepmenga to‘qqizinchi marta muddatidan avval qamoqdan chiqish iltimosini rad etdi. Bu haqda 61 yoshli jinoyatchining arznomasini ko‘rib chiqqan tegishli komissiyaning chop etilgan bayonotida ma’lum qilindi, deb xabar bermoqda “TASS”.
Chepmen uyushtirgan qotilligi uchun Nyu-York shtatining g‘arbiy qismidagi qattiq tartibli jazoni o‘tash muassasasida umrbod jazo muddatini o‘tamoqda. U qilgan ishidan afsusda ekanini ma’lum qilib, doimiy ravishda muddatidan avval ozodlikka chiqish haqida iltimos qiladi. So‘nggi bor u 2014-yilda arznoma bergan. Keyingi imkoniyat Chepmenga 2018-yilda beriladi.
Jon Lennonning bevasi Yoko Ono marhum turmush o‘rtog‘i qotilining ozodlikka chiqishiga bir necha bor qarshi chiqqan. Ayolning ta’kidlashicha, qotil qamoqdan chiqsa, o‘zi va ikki nafar o‘g‘li uchun katta xavf tug‘diradi.
Mark Devid Chepmen 1980-yilning 8-dekabrida, Nyu-York markazidagi “Dakota” nomli bino oldida The Beatles yetakchisini otib o‘ldirgandi. Lennon ovoz yozish studiyasidan uyga qaytayotganda qotil to‘pponchadan unga qarata besh marta o‘q uzgan.
Izoh (0)