Актёр Улуғбек Юнусов режиссёрликка мурожаат қилди. Унинг «Жосус кампир 007» номли илк фильми ҳақида батафсил маълумот олиш учун журналист Феруз Муҳаммад бошловчи режиссёр билан суҳбатлашди.
— Фильм ҳақида, фимнинг қисқача мазмуни, ғояси ҳақида гапириб берсангиз.— Бугунги кун аёлларида кўрмаган, билмаган нарсасини гапириб юриш ёки кўрганини бўрттириб, ўзидан 5—6 та қўшиб гапириш одати бор. Айнан кўрмаган нарсасини гапириш, ўзидан қўшиб гапириш орқали баъзи оилаларда муаммолар келиб чиқади. Фильмда худди шу муаммолар, камчиликларни, бизга ёт бўлган иллатларни кулгу йўли билан кўрсатиб беришга уринганмиз. Ҳар хил жанрлардан фойдаланиб, эксперимент қилган жойларимиз ҳам бор. Мисол учун, машҳур кинокомедияларнинг энг қизиқ усуллари, йўлларини олишга ҳаракат қилдик.
— Фильмда «жосус кампир» ролини ким ижро қилади?— Бу ролда Ўзбекистон халқ артисти Шафоат ая Раҳматуллаева намоён бўлади.
— Актёрлар жамоасида яна қайси машҳур номларни учратиш мумкин?— Бош ролларни Ўзбекистон халқ артисти Мурод Ражабов, Муҳаммадисо Абдулхаиров, Зарина Низомитдинова кабилар гавдалантиради.
— Фильм қачон катта экранларга чиқади?— Фильмни суратга олиш ишлари 2016 йилнинг январида бошланган эди. Айни кунларда фильм мухлислар эътиборига ҳавола қилишга шай ҳолда турибди. Премьера сентябрь ойининг ўрталарига мўлжалланган.
— Бу илк режиссёрлик ишингиз, шундайми?— Бунгача «Зумраша» ҳажвий киножурнали, ҳужжатли фильмлар, сериалларни суратга олиш ишларида ҳам қатнашганман. «Жосус кампир 007» эса катта кинода режиссёр сифатида хусусий киностудияда олган илк ишимдир.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)